**ప్రభుత్వ ఆసుపత్రి సేవలను ప్రజలకు చేరువ చేయాలి : జిల్లా కలెక్టర్ కోయ శ్రీహర్ష** *ప్రత్యేక వైద్య సేవలపై విస్తృత ప్రచారం నిర్వహించాలి* *ప్రైవేట్ ఆసుపత్రుల్లో అనవసర ఖర్చు చేయకుండా ప్రభుత్వ వైద్య సేవలను వినియోగించుకోవాలి* *రామగుండం ప్రభుత్వ జనరల్ ఆసుపత్రి

**ప్రభుత్వ ఆసుపత్రి సేవలను ప్రజలకు చేరువ చేయాలి : జిల్లా కలెక్టర్ కోయ శ్రీహర్ష**

*ప్రత్యేక వైద్య సేవలపై విస్తృత ప్రచారం నిర్వహించాలి*

*ప్రైవేట్ ఆసుపత్రుల్లో అనవసర ఖర్చు చేయకుండా ప్రభుత్వ వైద్య సేవలను వినియోగించుకోవాలి*

*రామగుండం ప్రభుత్వ జనరల్ ఆసుపత్రి (GGH)ను ఆకస్మికంగా తనిఖీ చేసిన జిల్లా కలెక్టర్*

---------------------------------------
**రామగుండం, జూలై-24:**
--------------------------------------
ప్రభుత్వ ఆసుపత్రి సేవలను ప్రజలకు చేరువ చేయాలని జిల్లా కలెక్టర్ కోయ శ్రీహర్ష అధికారులను ఆదేశించారు.

రామగుండం ప్రభుత్వ జనరల్ ఆసుపత్రి (జీజీహెచ్)ను జిల్లా కలెక్టర్ కోయ శ్రీహర్ష శుక్రవారం ఆకస్మికంగా తనిఖీ చేసి, ఆసుపత్రిలో అందుబాటులో ఉన్న ప్రత్యేక వైద్య సేవలు, రోగులకు అందిస్తున్న చికిత్సా సౌకర్యాలు, వైద్యుల సేవల అందుబాటు, మౌలిక వసతులను పరిశీలించారు.

ఈ సందర్భంగా *జిల్లా కలెక్టర్ కోయ శ్రీహర్ష మాట్లాడుతూ* ప్రభుత్వ ఆసుపత్రుల్లో ప్రస్తుతం అనేక ప్రత్యేక వైద్య సేవలు అత్యాధునిక సౌకర్యాలతో అందుబాటులో ఉన్నప్పటికీ వాటిపై ప్రజలకు తగిన అవగాహన లేకపోవడం వల్ల ప్రైవేట్ ఆసుపత్రులను ఆశ్రయించి అనవసరంగా అధిక వ్యయం చేస్తున్నారని అన్నారు. ప్రభుత్వ ఆసుపత్రుల్లో లభిస్తున్న అన్ని ప్రత్యేక వైద్య సేవల గురించి ప్రజలకు విస్తృతంగా అవగాహన కల్పించాలని వైద్యాధికారులను ఆదేశించారు.

ప్రభుత్వ ఆసుపత్రులు సాధ్యమైనంత ఎక్కువ మంది ప్రజలకు నాణ్యమైన వైద్య సేవలు అందించాలన్నదే ప్రభుత్వ లక్ష్యమని కలెక్టర్ పేర్కొన్నారు. ప్రజలు ప్రభుత్వ ఆసుపత్రులపై విశ్వాసం పెంచుకుని అందుబాటులో ఉన్న సేవలను పూర్తిస్థాయిలో వినియోగించుకునేలా చర్యలు తీసుకోవాలని సూచించారు. ప్రతి ప్రత్యేక వైద్య విభాగానికి సంబంధించిన సేవలు, వైద్యుల అందుబాటు రోజులు, చికిత్సల వివరాలను ఆసుపత్రి ఆవరణలో స్పష్టంగా ప్రదర్శించడంతో పాటు గ్రామాలు, పట్టణాల్లో ప్రచార కార్యక్రమాలు నిర్వహించాలని ఆదేశించారు.

తనిఖీ సందర్భంగా జిల్లా కలెక్టర్ ఆసుపత్రిలోని వివిధ ప్రత్యేక వైద్య విభాగాలను సందర్శించి, అక్కడ అందుతున్న సేవలను పరిశీలించారు.

**న్యూరో సర్జరీ విభాగాన్ని** పరిశీలించిన కలెక్టర్ వెన్నెముక సమస్యలు, మెడ సంబంధిత వ్యాధులు, తలకు గాయాలైన రోగులకు చికిత్స అందిస్తున్న విధానంపై వివరాలు అడిగి తెలుసుకున్నారు. న్యూరో సర్జన్ ప్రతి **బుధవారం, శుక్రవారం** రోగులకు సేవలు అందిస్తున్నట్లు అధికారులు తెలిపారు.

**ఫిజియోథెరపీ విభాగాన్ని** సందర్శించి ప్రమాదాలు, పక్షవాతం, కీళ్ల నొప్పులు, శస్త్రచికిత్సల అనంతర పునరావాస సేవలు పొందుతున్న రోగులతో మాట్లాడి అందుతున్న సేవలపై ఆరా తీశారు.

**2డీ ఎకో సేవలను** పరిశీలించిన కలెక్టర్ గుండె సంబంధిత పరీక్షలు **సోమవారం నుంచి శనివారం వరకు ఉదయం 9 గంటల నుంచి సాయంత్రం 4 గంటల వరకు** అందుబాటులో ఉన్నాయని అధికారులు వివరించారు.

**ఏటీఎఫ్ (Addiction Treatment Facility) కేంద్రాన్ని** పరిశీలించిన కలెక్టర్ మద్యం, మాదకద్రవ్యాలు, గంజాయి వ్యసనానికి చికిత్స, కౌన్సెలింగ్, పునరావాస సేవలు మరింత సమర్థవంతంగా అందించాలని సూచించారు.

**పీడియాట్రిక్ సర్జరీ విభాగంలో** పిల్లలకు హెర్నియా, తీవ్రమైన కడుపు నొప్పి, తిత్తులు, చీము గడ్డల డ్రైనేజీ వంటి సమస్యలకు శస్త్రచికిత్సలు నిర్వహిస్తున్న విధానాన్ని పరిశీలించారు.

**యూరాలజీ విభాగంలో** ఫిమోసిస్, మూత్రనాళ సమస్యలు, స్టెనోసిస్ వంటి వ్యాధులకు చికిత్స అందిస్తున్నట్లు అధికారులు వివరించారు. యూరాలజీ నిపుణులు ప్రతి **మంగళవారం, గురువారం** అందుబాటులో ఉంటారని తెలిపారు.

**న్యూరో ఫిజీషియన్ సేవలను** కూడా కలెక్టర్ పరిశీలించి, నరాల సంబంధిత వ్యాధులతో బాధపడుతున్న రోగులకు నాణ్యమైన వైద్య సేవలు నిరంతరంగా అందేలా చర్యలు కొనసాగించాలని సూచించారు.

ప్రభుత్వ ఆసుపత్రుల్లో అందుబాటులో ఉన్న ప్రతి ప్రత్యేక వైద్య సేవపై ప్రజలకు స్పష్టమైన సమాచారం చేరేలా ప్రచార కార్యక్రమాలు చేపట్టాలని, ఎక్కువ మంది రోగులు ప్రభుత్వ వైద్య సేవలను వినియోగించుకునేలా చర్యలు తీసుకోవాలని జిల్లా కలెక్టర్ వైద్యాధికారులను ఆదేశించారు. ప్రభుత్వ ఆసుపత్రులు ప్రజల ఆరోగ్య భద్రతకు ప్రధాన కేంద్రాలుగా నిలవాలని, నాణ్యమైన వైద్య సేవలతో ప్రజల విశ్వాసాన్ని మరింత పెంచాలని సూచించారు.

ఈ కార్యక్రమంలో మెడికల్ కాలేజ్ సూపరిండెంట్ డా. హిమబిందు సింగ్,సి.ఎస్.ఆర్. ఎం.ఓ.డా. కృపా బాయి,డా.అప్పా రావు, సంబంధిత డాక్టర్ లు తదితరులు పాల్గొన్నారు